Kimiad an Ene

Ton

1. Didostait da gleved kana an disparti A ra an ene mad pa z'a maez d'eus an ti ( diou wech). 2. Eñ a ra ur sellig, ur sellig ouzh an traoñ, Da gomz ouzh e gorf paour zo war e wele klañv. AN ENE 3. Siwazh ! deut eo, va c'horf, an termen diwezhañ : Ret eo din az kuitaat, ha kuitaat ar bed-mañ. 4. Kleved a ran taolioù morzholig an Ankou Mezevellet eo da benn, yen-sklas da vuzelloù. 5. Ken euzhus eo da zremm, ker glas da zaoulagad ; Siwazh dit-te ! va c'horf, ret eo din az kuitaat. AR C'HORF 6. Mar d'eo euzhus va dremm, ha glas va daoulagad, Gwir a lavarit-hu, ret eo deoc'h va c'huitaat. 7. Dispriz ha dizanav e kavit ho mignon; Karget a sioù fall, siwazh! evel ma'z on. 8. An heñveledigezh zo mamm ar garantez ; Pa n'he c'havit ganin, em lezit a gostez. AN ENE 9. Salokras, mignon ker, me n'ho tisprizan ket Eus ar c'hourc'hemennoù n'ho-peus hini torret, 10. Hogen Doue a venn, meulomp E drugarez, Lakaat fin d'am c'halloud ha d'ho sujedigezh. 11. Setu ni disparet gant ar marv digar, Setu me unanik tre 'n neñv hag an douar, 12. Tre 'n neñv hag an douar evel ar goulmig c'hlas A eas maez eus an arc'h da c'hout ha glav oa c'hoazh. AR C'HORF 13. Hogen ar goulmig c'hlas en-dro oa distroet D'an arc'h lec'h ma oa kent, ha c'hwi na reot ket. AN ENE 14. Ober a rin avat, touiñ a rann-me dit, Benn ar varn diwezañ me'n em gavo ganit. 15. Me'n em gavo ganit, ker gwir ma' z an bremañ Dirak ar varn gentañ, siwazh ! ken a grenan 16. Bez fisiañz, va mignon; mor-blaen goude gwalarn; Dont a ran-me neuze da begiñ en da zorn ; 17. Pa vefes 'vel houarn, pa vin-me bet en neñv, Evel ur meanig-tenn me az tenno ganin. AR C'HORF 18. Pa vin-me, ene kaezh, en ur bez astennet Ha dre vreignadurezh en douar dispennet ; 19. Pa n'am bezo na biz, na dorn, na troad, na brec'h Diwezat a vo deoc'h fallout ma c'has ouzh krec'h. AN ENE 20. Neb a grouas ar bed, heb skouer na danvez, En-eveus ar c'halloud d'az ober a nevez. 21. Neb az anaveze, en amzer na oas ket, A c'hello da gavout e-lec'h na vezi ket.

22. Ni 'n em gavo ker gwir, ker gwir ma 'z an bremañ, Dirak ar varn c'harv, siwazh ! ken a grenan ! 23. Ken a grenan, siwazh ! ken ven ha ken dister Hag an delien lammet gant ur barrad-amzer.- 24. Doue glev anezhan, Doue respont buhan ; - Ai ta, ene paour, ne vi ket pell e poan -, 25. Te 'peus ma servijet dre 'm out bet war ar bed, Ha bremañ te po lod eus-a va joausted.- 26. Eñ d'ober, o pignat, ur sell c'hoazh ouzh an traoñ, Ha gweled e gorf paour stegnet war ar varskaoñ. AN ENE 27 .- Demat dit-te, va c'horf, demat a laran dit, Distreiñ a ran en-dro, gant kalz truez ouzhit. AR C'HORF 28. - Tavit, o ene kaezh, gant komzoù alaouret, Poultr ha breignadurezh n'eus keer truez ebed. AN ENE 29. - Salokras, o va c'horf, dellezout a rez 'vat Kerkoulz hag ar pod-pri oe ennañ louzoù-mat AR C'HORF 30. Kenavo 'ta, buhez, kenavo pa 'z eo ret ! Doue d'ho c'has d'al lec'h m'hoc'h eus c'hoant da vonet 31. C'hwi vo dihun bepred, me, siwazh ! a gousko ! N'am ankounac'hit ket, hag hastit an distro. 32. Na penaos a rit-hu, lavarit-hu din-me ? Ken drant ouzh ma c'huitaat, ken digonfort on-me AN ENE. 33. - Eskemmañ drein garv gant rozennoù 'm eus graet Ha gant mel meurbet dous ur vestl c'hwerv-meurbet.- 34. Neuze, laouen ha skañv evel un alc'hweder ; An ene sav, e sav, e sav e-barzh an aer. 35. Hag evel m'eo degoue'et, skeiñ a ra war an nor, Ha d'an aotrou Sant Per hi a c'houlenn digor. AN ENE. 36. Oh ! c'hwi ' aotrou Sant Per, a zo karantezus, C'hwi am digemero e baradoz Jezuz ? SANT-PER. 37. E baradoz Jezuz e vi digemeret, Rak tra ma oas er bed He zigemer peus graet.- 38. Hag en ur vonet tre eñ a zistro en-dro, Hag a wel e gorf paour 'vel ur bern douar-gozh. AN ENE. 39. Kenavo dit, va c'horf, ha da drugarekaat ; Kenavo, kenavo da draonienn Jozafat. 40. Me glev ur veuleudi 'vel na glevis he far, Tizh zo war ar c'houmoul, ar gouloù deiz a bar ! 41. Setu me o vleuniañ evel ur boudig roz A-hed gwazh ar Vuhez e liorzh ar baradoz.