An Eostig


Ton

Evit klevoud ur gwir eostig o kanañ, klik AMAÑ

1. 'r wreg yaouang a Zant Malo, dec'h,
'r wreg yaouang a Zant Malo,
Toull he frenestr a ouele, d'an nec'h. (diou wech)

2. "Siwazh, siwazh, me zo tizhet ! (d.w.)
Va eostig paour a zo lazhet ! (d.w.)

3. - Livirit din, va gwreg nevez
Perak 'ta savit kel lies

4. Kel lies diouzh va c'hostez-me
E-kreiz an noz, diouzh ho kwele

5. Diskabell-kaer ha diarc'hen
Perak 'ta savit evel-hen ?

6. - Mar savan, den ker, evel-se
E-kreiz an noz, diouzh va gwele

7. Da eo ganin, setu, gwelet
Al listri bras mont ha donet

8. - Ne d-eo ket, vat, evit ul lestr
Ez it kel lies d'ar prenestr

9. Ned-eo ket evit al listri
Nag evit daou nag evit tri

10. Ned-eo ket evit o gwelet
Kennebeut al loar, ar stered

11. Va itron, din-me livirit
Da berak bep noz e savit

12. - Sevel a ran da vont da sell
Ouzh va bugel en e gavell.

13. - Ned-eo ket ken evit sellet
Sellet ouzh ur bugel kousket

14. Ned-eo ket gevier a fell d'e:
Da berak savit evel-se ?

15. - Va denig kozh, ma na daerez,
Me lavaro ar wirionez:

16. Un eostig a glevan bep noz
Er jardin, war ur bodig-roz

17. Un eostig bep noz a glevan
Ken ge e kan, ken dous e kan !

18. Ken dous e kan, ken kaer, ken flour
Bep noz, bep noz, pa sioula 'r mor !"

19. An aotrou kozh 'dal m'he c'hlevas
En e galon a brederias

20. An aotrou kozh 'dal m'he c'hlevas
En e galon a lavaras :

21"Pe mar 'mañ gwir, pe ma n'eo ket
An eostig a vo paket !"

22. Antronoz-beure, pa savas
Da gaout ar jardinour ez eas

23. "Jardinour mat, sentit ouzhin
Un dra zo a ra glac'har din

24. Er c'harzh ez eus un eostig-noz
Ne ra nemet kanañ en noz

25. 'Hed an noz ne ra 'met kanañ
Ken emaon dihunet gantañ

26. Mar 'mañ paket fenoz ganit
Ur gwenneg aour a roin dit"

27. Ar jardinour pa'n deus klevet
Un ulmennig en deus stignet

28. Hag an eostig en deus paket
Ha d'e aotrou 'n'eus hen kaset

29. Hag an aotrou, pa hen dalc'has
A-walc'h e galon a c'hoarzhas,

30. Hag e vougas, hag e daolas
War barlenn wenn an itron gezh

31. "Dalit, dalit, va gwreg yaouank
Setu amañ hoc'h eostig koant

32. Me 'm eus hen paket evidoc'h
'Michañs, va dous, e plijo deoc'h"

33. He den yaouank, 'dal ma klevas
Gant glac'har vras a lavaras :

34. "Setu ma dous ha me tizhet:
Ne c'hallfont mui en em welet

35. Da sklaerder 'l loar, d'ar prenester
'Vel ma oamp boazet da ober"


Galleg Saozneg